திண்டுக்கல் – கரூர் சாலையில் அமைக்கப்பட்டுள்ள தொடர்வண்டி சுரங்கப் பாதையைச் சரிசெய்து விரைந்து மக்கள் பயன்பாட்டிற்குக் கொண்டுவர வேண்டும்! – சீமான் வலியுறுத்தல்
திண்டுக்கல் மாநகரம் அருகே கரூர் சாலையில் அமைக்கப்பட்டுள்ள தொடர்வண்டி சுரங்கப் பாதையில், கழிவுநீர் தேங்கி மக்கள் பயன்படுத்த முடியாத அளவிற்கு மோசமாக உள்ளதை சரிசெய்து தராமல் வேடிக்கை பார்க்கும் திமுக அரசின் மெத்தனப்போக்கு வன்மையான கண்டனத்திற்குரியது.
திண்டுக்கல் மாநகரிலிருந்து கரூர், திருச்சி செல்லுகிற இணைப்புச் சாலைகள் அருகருகே உள்ளன. இந்த இரு சாலைகளின் குறுக்கேயும் திண்டுக்கல் – பாலக்காடு செல்லும் இருப்புப்பாதை அமைந்துள்ளது. தொடர் வண்டி வரும் நேரங்களில், இரு சாலைகளிலும் போக்குவரத்து நெரிசல் ஏற்பட்டு மாணவ-மாணவிகள், விவசாயிகள், ஆசிரியர்கள், பணியாளர்கள் என அனைவரும் பெரும் பாதிப்புக்குள்ளாகினர். இதனை சரி செய்ய சுரங்கப்பாதை அமைத்துத் தரவேண்டி அப்பகுதி மக்கள் தொடர்ந்து பல ஆண்டுகள் போராடி வந்த நிலையில், கடந்த அதிமுக ஆட்சிக்காலத்தில் திண்டுக்கல் -, திருச்சி சாலையின் குறுக்கே மேம்பாலமும், அதனருகே செல்லும் திண்டுக்கல் – கரூர் சாலையில் சுரங்கப்பாதையும் அமைக்கப்பட்டது.
ஆனால் ரூ.17கோடி மதிப்பில், 20 அடி ஆழத்தில் கட்டப்பட்டுள்ள சுரங்கப்பாதை பல்வேறு குறைபாடுகளுடன் அமைக்கப்பட்டுள்ளதால் மக்கள் பயன்படுத்த முடியாத அவலமானச் சூழல் ஏற்பட்டுள்ளது. கோடைக்காலத்திலும் சுரங்கத்திற்குள் தண்ணீர் தேங்கி, கழிவு நீர் ஓடை போலக் காட்சியளிப்பதால் நோய்த்தொற்றும் பரவி வருகிறது. இதனை சீர்செய்து தரக்கோரி திண்டுக்கல் மக்கள் தொடர்ந்து போராடி வரும் நிலையில், திமுக ஆட்சி பொறுப்பேற்று இரண்டு ஆண்டுகளாகியும் வேடிக்கைப் பார்ப்பதென்பது, அதிமுக அரசு செய்த தவறுக்கு திமுக அரசும் துணை நிற்பதையே காட்டுகிறது.
ஆகவே, இனியும் அரசு காலம் தாழ்த்தாமல் மக்களின் நலனைக் கருத்திற்கொண்டு மாவட்ட நிர்வாகம் மூலம் தவறான முறையில் அமைக்கப்பட்டுள்ள திண்டுக்கல் – கரூர் சுரங்கப்பாதையைச் சீரமைத்து துரிதமாக மக்கள் பயன்பாட்டிற்கு கொண்டுவர வேண்டுமென நாம் தமிழர் கட்சி சார்பாக வலியுறுத்துகிறேன்.
திண்டுக்கல் – கரூர் சாலையில் அமைக்கப்பட்டுள்ள தொடர்வண்டி சுரங்கப் பாதையைச் சரிசெய்து விரைந்து மக்கள் பயன்பாட்டிற்குக் கொண்டுவர வேண்டும்!https://t.co/qApeUYbWwW@CMOTamilnadu @mkstalin pic.twitter.com/xf6pVoebNP
— செந்தமிழன் சீமான் (@Seeman4TN) July 21, 2023
– செந்தமிழன் சீமான்
தலைமை ஒருங்கிணைப்பாளர்
நாம் தமிழர் கட்சி
